Орґанизована, фахова робота Библиотеки датує од 1953. року. Розвою єй роботи предходзела, такой по ошлєбодзеню, велька акция збераня кнїжкох – прилоги гражданох, а вельке доприношенє у тей акциї дала тедишня младеж. Ґу назбераним кнїжком доложени и зачувани кнїжки зоз Варошкей школи, як и остаток кнїжкох здруженя „Коло српских сестара“. Така формирана Библиотека припадала Синдикалней ради, а була змесцена у будинку Задружного дому. О кнїжкох ше старали и робели на їх видаваню углавном просвитни роботнїки – на добродзечней основи, а тиж им у тей роботи помагала и дежурна младеж.

Зоз моцнєньом КУД Библиотека прешла под защиту Дому култури. Теди перши раз задлужени просвити роботнїк як хонорарни роботнїк библиотеки (Мария Тутолмин). Од 1953. року  Библиотека ше осамосталює – видвоює ше зоз Дому култури. Финансованє Библиотеки пребера НО, котри поставя першого библиотекарского службенїка зоз полним роботним часом (Коска Катица). У тим чаше Библиотеки додзелєна велька простория у будинку нєшкайшого Роботнїцкого универзитету у котрей Библиотека остава по початок 1957. року.  Пре цесни и мали простор, початком 1957. року Библиотека ше уселює до просторийох Землєдїлскей задруґи у котрих ше находзела по 1987. рок.

Часови интервал од 1953. по 1959. рок представя стаємни успишни розвой Библиотеки котри ше насампредз виказує у ширеню кнїжних фондох, опременосци и фаховей ушореносци. З одходом библиотекара и приходом нового настава кратки период стаґнациї по 1961. рок. Од 1961. року Библиотека постава самостойна установа зоз рочнима дотациями СО. До єй компетенциї преноша ше финансийно-административни роботи котри по теди водзела служба СО. Зоз ангажованьом трох библиотекарох роботнїкох у Библиотеки омогущена робота зоз хаснователями библиотечного материялу през цали дзень.

Од 1987. року по 2008. рок Библиотека мала у власносци свой будинок у котрим було змесцене оддзелєнє за роботу зоз дзецми, пожичкове оддзелєнє за одроснутих и оддзелєнє за набавянє и обрабянє библиотечного материялу.

Нажаль, у августу 2008. року будинок Библиотеки згорел и од теди Библиотека „дочасово“ змесцена у будинку Пионирского дому дзе условия за дїялносц установи анї кус нє одвитую потребним стандардом.